Dr. Sangthankima
Founder chairman. TNT
Bible kan pawm dan leh kan hriat dan hi lehkha thu mai ang hi a ni fo mai. Hmun thenkhatah phei chuan Bible zir hi an ngaisangin an dah chungnung em em a, Mosia sulhnute, Lota nupui sulhnute, lehkha ziaka kan chhiara kan hmuh ang zawnga Pathian thu hriat hi “Lehkha thu mai chuan a tihlum thin” II Korinth. 3:6 a tih ram hi a ni. Bible hi kan hre vak a, kan zir vak vak mai a, nunga hriat hi a pawimawh ber a ni. Amah leh amah kha kan hmehbel a, kan tihlum tawk chiah chiah a ni. Chutiang chiah chuan Lal Isua chanchin pawh hi Amah Lal Isua leh a hunlai amiteah khan kan hmehbel daih mai a, khatiang zawnga Isua chanchin hriat vak tum emaw, Pathian lehkha thu reng reng hetiang zawnga hriat vak tumna a awm thin. Kan hriatchian atan thil pawimawh tak mai chu Isuan mihring fapa a intih tlat chhan hi han sawifiah ta ila, mihring leh a mah kha a in sawi belhbawm tlat a ni. Tin, pakhat leh ah chuan “ Thu chu tisaah a lo chang a” Johana 1:14 tih kan hmu leh a, mihring fapa tih leh thu chu tisaah a lo chang tih hi a intluk a ni, tiin kan hrethiam thei ang.
Isua sulhnu kan tih hian, Palestia ram dung leh vang a fang a, damlote tidamin, pharte a tithianghlim a, thil mak tam takte a ti a. Heti zawnga Lal Isua chanchin hriat mai hi a awl em em a ni. Hei hi tam takin kan ngaih ropui ber a ni nghe nghe. A tawrhna tuarpui leh amah chawimawina phurpui hluah ringawt hi a tawk lo. Lal Isua Krista chuan sulhnu a neih tlat a ngai, rawngbawla vak vak si Isua sulhnu hnutchhiah lo rawngbawltu hian rilru an tina thinin ka vei em em a ni.
Khawi atanga lo chhuak nge i nih le? I nuin a puma a pai hma che khan i pa a mi “ chi” i ni hmasa, mihring anga i lo pian hma leh i nu leh i pa pawh an awm hma khan Pathian ami i ni hmasa a sin. I nu leh i pa aiin Pathian a hmasa zawk a ni. “Abrahama awm hma pawhin ka awm a ni.” A ti daih mai ( Johana 8:58 ). Leilung pian hma daih tawh khan a lo thlang daih tawh che. ( Ephesi 1:4 ). Kan Lal Isua hi a lo thuk em a, engkimah min khalh vek a lo ni. Pathianin mihring a siam hma khan mihring hi Pathian ami a ni hmasa a, Pathianin leia vaivutin mihring a siam a, a hnarah Nunna thaw a thaw lut a, minung a lo ni ta a. Pathian thaw chu tuna kan thlarau hi a ni.
Tichuan kan taksa leh kan Thlarau in belhbawm chu Pathian hrin mihring a lo ni ta. Chutiang chiah chuan Lal Isua khan Pathian leh mihring nihna chu a rawn chang kawp ta chiah a, Lal Isua kha miin tunge a ni tia an zawhin” mihring fapa” a in ti a ni. Mihring leh amah Isua kha a rawn sawi kawp nghal thlap a ni. Chutichuan Pathian thu chu khawiah nge a awm?. A thuah ( Johana 1:1) Pathian thu chhuak hmang chiah hian Pathianin mihring chungah thil a ti thin a ni. Chu Pathian thuchhuak chu Mari chhûngah lutin Marin a pâi ta a, a rawn hrin chuan a hmingah Isua an sa a ni. Chuvang a ni Lal Isuan “Kei Paah ka awm tih leh Pa keimahah a awm” a tih chhan kha. A tîrin Thu a awm, Thu chu Pathian hnênah a awm, Thu chu Pathian a ni tih hian a sawi fel vek mai a ni.
Lei lah van siamtu Pathian chuan Thlarau Thianghlim hmangin mihring chhungah Lal Isua Nunna Thlarau chu a rawn piantir ta. Isua nunna hring chhuak lo Thlarau hi Thlarau Thianghlim a ni lo. Pathian thu chak tak mai chu mihring chhunga a lo thlen chiah khan, Thu tisaa a lo channa chu a famkim kan chang ta a ni. Thlarau chuan keimahni thlarau nen Pathian fa kan ni tih min hriattir thin.
Lal Isua hian mihring ( a mihrin) a chhandamte atanga sulhnu neih hi a tum a ni. Vântirhkohte atangin emaw sulhnu neih a tum lo. Sual bawi ata chhandamte atang ngei hian sulhnu neih hi a tum tlat a ni. Mihringte tel lova a sulhnu ringawt kha chu Bibleah hian tam tak kan chhiar thin, khami hriatna ringawt kha chu a ni ta lo. Mihring te kal tlanga sulhnu a rawn neih chiah chiah a kha kan tihah min pawmsak tlat a ni. Ama tih ni reng si kha kan tihah min khawl sak zel a ni. Chuta chuan a tum lian ber chu boralte zawnga chhandam hna, a mihrinte kaltlangin kha chhandamna hna kha bul a rawn tan ta a ni. Chu chu Isuan sulhnu neih a duh dan chu a ni.
Keimahni in dah that daih a ni ta lo a. Thlarau hruai a awm a ngai a, Thu tisaa a channa ngei hian kan chhungah a lo thleng ta a. Mihring fapa a in tihna hi kan thlarau leh Krista nihna in, min belhbawmsak tlat a ni. Chu chu khawiah nge min belhbawm kan tih chuan Isuaah tih ringawt in a famkim thei ta lova, Pathianah tih ngawtin a kim thei hek lo. Thlarau Thianghlimah Krista nunna leh Thlarau hi min belhbawm thlap a, chutichuan pumkhat kan ni ta. A pumkhat pui atang hian Lal Isua hian sulhnu neih a duh a ni.
LALPAN A THU MALSAWM RAWH SE.
Comments
Post a Comment